اوْرتوقرافي چاليشمالاريميز و بوُگوٍنکو طلبلر و تکليفلر

 

ابراهيم رفرف

 

۱۳۸۰- جي ايلده يازيچيلار، اوْخوجولار و آذربايجان ديلينده چيخيش ائدن مطبوعاتين ايشتيراکي ايله کئچيريلميش اوْلان اوْرتوقرافي سميناري‌نين آلديغي قرارلار ديليميزين اساسلاريني برکيتمک و اوْنو موًحکم قايدالار چرچيوه‌سينه يوًنلتمک اوُغروندا آتيلميش ان قيمتلي آدديملاردان ايدي. بيز بوُ گوٍنه‌دک وارليقدا همين قايدالاري بوٍتون اينجه‌ليکلري ايله تطبيق ائتمگه چاليشميشيق و داخيلده و خاريجده نشر اوْلان کيتابلار و قزتلر ده گئنيش ميقياسدا بوُ حرکته قاتيلميشلار. بوُ قايدالارين اهميتلي جنبه‌لريندن بيري ده اوْنلارين دموْکراتيک پرينسيپلر اساسيندا قبول ائديلمه‌سيدير کي، «شخصي» يازي قايدالاري‌نين ترسينه اوْلاراق، اوْنلارين گئنيش ميقياسدا تبليغ ائديلمه‌سي و بوٍتون يازيلاردا اساس گوًتورولمه‌سي‌نين مشروعيت قايناغي ساييلماقدادير.

داخيلدن و خاريجدن گلن مکتوبلار و موٍناسيبت بيلديريشلري اوْرتوقرافي ايشي‌نين دوٍزگون ايستيقامتده ايرلييه آدديملاديغيني گوًسترمکده‌دير. بوًيوک قلم صاحيبي رضا براهني‌نين ايفاده‌سي ايله دئسک: «اوْرتوقرافي سميناري‌نين آلديغي قرارلار علمي و دموکراتيک قرارلاردير، آنجاق  فارس ديلي‌نين ايملا قايدالاري هله ده غئير- علمي و فرماييشي کاراکتر داشي‌يير». رضا براهني ‌نين سوًزونو بئله باشا دوٍشمک اوْلار کي، فارس ديلي‌نين ايملا قايدالاريني تثبيت ائتمک اوٍچون يازيچيلاردان و قلم صاحيبلريندن عيبارت هله‌ليک هئچ بير گئنيش توْپلانتي  تشکيل ائديلمه‌ميش  و اينديکي يازي قايدالاري بير- ايکي شخصي تشبّوٍث اساسيندا فوْرمالاشميشدير.

بوُ دوْغرودور کي، هله ده فارس ديلينده بوُ قدر گئنيش  احاطه‌لي و علمي ماهيته اساسلانان ايملا قيلاووزو يوْخدور و ايملا قايدالاري صرف و نحو علملري ايله علاقه‌دار تحقيق ائديلمه‌ميشدير و بوُ ساحه‌ده گوًروله‌سي ايش چوْخدور کي، فارس ديل و ادبيات قوُرومو (فرهنگيستان) طرفيندن تشکيل ائديلمکده‌دير و اوْنلارين چاليشمالاري‌نين  اوُغورلو نتيجه‌لريني ياخين گله‌جکده گوًرمک آرزوسونداييق.

بيزه ائله گلير کي، آذربايجان توٍرکجه‌سي‌نين اوْرتوقرافي اساسلاري، گئنيش احاطه‌لي اوْلدوغونا  و علمي اساسلارا سوًيکنديگينه گوًره، عرب اليفباسيندا يازيلان بوٍتون توٍرک ديللرينه  و حتا فارس ديلينه اوًرنک اوْلا بيلر.  سوْن واختلار کلاله شهرينده «مختومقلي فراغي» آدينا توٍرکمن ادبي درنگي‌نين تشبّوٍثو ايله اوْرتوقرافي گوًروشلري ترتيب ائديلميشدير و گله‌جکده بوُ گوًروشلرين دوامينا شاهيد اوْلاجاغيق. بيز توٍرکمن باجي- قارداشلاريميزا توًوصيه ائديريک کي، اوًز چاليشمالاريني علمي شکيلده تشکيل ائتسينلر و آذربايجان توٍرکجه‌سي‌نين اوْرتوقرافي اوٍسلوبلارينا ديقتله فيکير وئرسينلر.

بوُرادا بعضي فيکير آيريليقلاريني داگوًزدن کئچيرمک  يئرلي اوْلا بيلر. ميثال اوٍچون شاعير کريم مشروطه‌چي جنابلاري آلينما سوًزلرين اوْريژينال ايملادا يازيلماغي‌نين طرفداريدير. هابئله قوْجامان قلم صاحيبي اوُستاد بهزاد بهزادي اوًز شخصي يازي قايدالارينا اوٍستونلوک وئرير و  سوْن واختلاردا نشر ائتديگي  «آذري» آدلي دَيَرلي ادبيات درگيسينده همين شخصي ايملا اوٍسلوبونو تطبيق ائتمکده دوام ائدير. اوُستاد بهزادي‌نين حيات بوْيو چاليشاراق خالقيميزا و ديليميزه گوًسترديگي  خيدمت و اوْنون قيمتي اوًلچويه گلمز، آنجاق بيز اوًزوموزو بئله بير تنقيدي ايرَلي سوٍرمکده حاقلي حساب ائديريک کي، اوُستاد بهزادي اوْرتوقرافي سميناري‌نين آپاريجي هئيأتي‌نين موٍثّير عوٍضوو اوْلموشدور و آلينان قرارلارا قوْل چکميشدير. اوُستاد بهزادي هابئله سميناردا قئيد ائتدي کي : «من اوًز شخصي اوٍسلوبوما هله ده اينانيرام، آنجاق نه قدر کي، باشقا بير قرار آلينماييب، من بوُ سمينارين آلديغي قرارلارا سايغيلي قالاجاغام.».  اوٍسته‌ليک اوُستاد بهزادي‌نين شخصي يازي قايدالاري نئچه ايلين سيناغيندان ناييليتسيز کئچميشدير و  شخصي (تک نفرليک) يازي اوٍسلوبو اوْلاراق قالماقدادير. بئله اوْلدوغو حالدا، بيزيم آرزوموز اوْدور کي،  ايملا بيرليگينه ناييل اوْلماق اوٍچون «آذري» نشريه‌سي ده «اوْرتوقرافيک» اوٍسلوبدا ترتيب ائديلسين.

دوْکتور حسينقلي سليمي و اوُستاد احمد شايا دا هر زامان اوْرتوقرافي سمينارينا منفي موٍناسيبت بيلديرميشلر و اوًزلري‌نين شخصي ايملا اوٍسلوبلاريني يازيلارينا تطبيق ائتمکده ايصرارلي اوْلموشلار.

اوْرتوقرافي سميناري‌نين آلديغي قرارلار «تک نفرليک» ايملا قيلاووزلاري دگيل، قلم صاحيبلري‌نين اکثريتي‌نين موًوقعيني تمثيل ائتمکده‌دير و اوًز مشروعيتيني ده ائله بوُرادان قازانير. بير ده اوْنو قئيد ائتمک لازيمدير کي، اوْرتوقرافي سميناري‌نين آلديغي قرارلار «وارليق» درگيسي‌نين خوٍصوصي ايملا اوٍسلوبو دگيل، بوُ قايدالارا بيز ده باشقالاري کيمي «اوُيغونلاشماق» ضرورتيني حيس ائده‌رک اوُيغونلاشديق و ايملا قايدالاريني دوٍزگون تطبيق ائتمه‌ديگيميز حالدا بير چوْخ تنقيد و اعتيراضلارلا قارشيلاشيريق. هر حالدا کمال بيردن- بيره حاصيل اوْلماز و هر زامان داها دوٍزگون ايستيقامتلري آراماق لازيم گله بيلر.

آنجاق کسکينليکله فيکير وئريلمه‌ليدير کي، بوُرادا بوًيوک امک حسابينا ياراتديغيميز تمللري پوْزوب، يئنيدن ياراتماق فيکري دوٍزگون اوْلا بيلمز. بيز ذاتاٌّ قرارا آلديغيميز ايملا قايدالاريني نئچه ايلدن بير گوًزدن کئچيرمک و قلم تجروٍبه‌لريميزدن فايدالاناراق، اوْنلاردا موٍعيّن تنظيمات تطبيق ائتمگي منطيقه اوُيغون گوًروروک.

وارليق درگيسي بير داها بعضي کلمه‌لرين يازيليشي حاقّيندا قلم تجروبه‌لرينه ماليک اوْلان بوٍتون ضياليلارا اوٍز توُتور و اوْنلارين فيکريني اوًيرنمگه چاليشير و اوْنلاردان آشاغيداکي سوْرغولارا جاواب وئرمکله بوُ آراشديرمادا بيزه يارديمچي اوْلماقلاريني ريجا ائدير. نظرده توُتولماليدير کي، هر کلمه بير قروُپو تمثيل ائدير، مثلاٌّ شوًهرت، صوًحبت، حوًرمت، توًهمت کيمي کلمه‌لرين سس قوُرولوشو عئيندير، ياخوُد دا موٍباريزه، موٍصاحيبه، موٍشاجيره کيمي کلمه‌لر باشقا بير قروُپون اوًرنگيدير. نوًوبتي صحيفه‌ده قئيد اوْلونان سوْرغولارا قارشي جاوابلارينيزي ان قيسا زاماندا وارليق درگيسي‌نين آدرسينه (تهران، خيابان فلسطين شمالي، شمارة ۱۵۱) گوًندرمگينيزي ريجا ائديريک و بوُ آراشديرما ايشينه قاتيلماغينيزدان دوْلايي تشکّوروموزو بيلديريريک.

 

يازي قايدالاري حاقّيندا فيکير يوْخلاما ورقه‌سي

 

 

آشاغيداکي کلمه‌ يازيليشلاري‌نين هانسيني بَيَنيرسينيز؟

 

* تبريزدن                * تبريزده‌ن

* گه‌لميشه‌م              * گلميشم

* گوًزل                   * گوًزه‌ل

* موٍشکول               *مشکل

* موٍزد                    * مزد

* انسان                   * اينسان

* استقلال                * ايستيقلال

* معاصير                 * موٍعاصير

* موًحکم                 * محکم

* حوًرمت                * حرمت

* صوًحبت               * صحبت

* شهرت                 * شوًهرت

* ورزش                 * ورزيش

* دانيشگاه                * دانشگاه

* ظارافات               * زارافات

* اوُجوز                  * وُجوز

* يکي، يستي            * ايکي، ايستي

* ئوًلکه                   * اوًلکه

* دئديم کي...            * دئديم که...

* گمان                   * گوُمان

* بوًيوک                  * بيوک

* ترک                    * توٍرک

* به‌ح- به‌ح              * به- به

* اوٍره‌ييمي               * اوٍرگيمي

* گه‌ره‌کمه‌ز              * گرکمز

* دوْغرو دگيل.          * دوْغرو دئييل.

 

وارليق درگيسي‌نين اينديکي ايملاسي

* اوْخوناقليدير.

* آز اوْخوناقليدير.

* اوْخوناقسيزدير.

 

ايملا قايدالاريميزدا هانسي دوٍزليشلري تکليف ائدردينيز؟ فيکرينيزي اطرافلي شکيلده آچيقلايين.

 

 

 

 

 

اوْرتوقرافي چاليشمالاريميز و ديليميزين گله‌جگي

ابراهيم رفرف

 

قوْجامان ادبيات خاديمي يحيي شيداجنابلاري مهد آزادي روُزنامه‌سي‌نين ۱۳۸۳/۲/۱۶ تاريخلي ساييسيندا «تزه بير ده‌للک گليبدير، کاکيلي ياندان قوْيور» باشليقلي بير يازيدا اوْرتوقرافي قرارنامه‌سينه موٍناسيبت بيلديرميشدير. يحيي شيدا جنابلاري اوًز يازيسيني بوُ شعرله بزه‌ميش:

دوٍشمن بير اوْلسا دفعيني آساندير ائيله‌مک،

واي اوْل زامان کي، اوٍز قوْيا هر بير کناردان.