نمونه هائي از شعر معاصر استان همدان آزربايجان

------------------------------------------------------------

معصومه صادقي سپهر

رزن شهه ريندن- همدان اوستاني – آذربايجان

(عرب ادبييات ليسانسييه سي)

منيم آي غملي ديليم !

(« سينا » هفته لييي نين 113- نجو ساييسيندا چاپ اولموش )

منيم آي غملي ديليم !
درده بورونموش
سنه چوخ دردلي سؤزوم وار
سنه ايللر بوْيو قان آغلاماغا بيل كي گؤزوم وار
داخي دوستاقلي گؤنول ايچره كؤزوم وار
سن آتامين ديلي‏سه ن ، هم ده آنامين
ائليمين ، ميللتيمين ، كيمليييمين
بايراغي سَنسَه ن
تؤركلويون شانلي نيشاني
اُولاماز نازلي ديليم من سني آتام
اؤزگه ‏لر ديلينه ، ياد ائللرينه من سني ساتام
سني آلداتماييرام
سني ايچدن سئويره‏ م
سن اگر سولغون اولاسان ، سولاسان
گؤزلريم گؤز ياشيني دالغالارام
ظولمه قارشي آخارام
كؤزه ‏ره ‏ن گؤكسوم اوديله ياخارام
ظولمه سوْن نوقطه‏ سيني قويمالييام
سنه من آند ايچَه ره ‏م
آخي تورك'ون توْرونو
آنا "تومروس" قيزييام
آي منيم غملي ديليم !
درده بورونموش
سنه من آند ايچه ره ‏م
سنه من آند ايچه ره ‏م

------------------------------------------------------------

مهدى كردخورى ملايرى

اشعار زير از شاعر ترك ملايرى - از استان آذربايجانى همدان- مهدى كردخورى ملايرى است:

ماه اوزونه سالميش بير ملك منظر
مؤعتبر زولفلرين زر افشان اولدو.
عئشق آتشى منى سالدى آياقدان
هئچ دئمه ز عاشيقى ناتوان اولدو.

يوسيف سنسه ن زولئيخانين معشوقو
عالمه دوشوبدو شووقون ايشيغى
ايختييارين الدن آلدين عاشيقى
عاشيق ديندن چيخدى٬ بىايمان اولدو.

هر باخاندا عيشوه ساتارسان منه
چوخ بىمورووت سه ن٬ يئتيشديم جانا
بيلير عالم گيريفتارام من سنه
حق مورووتين كسسين٬ باغريم قان اولدو.

جهد ائده ر ده قورتارماغا عهدينى
امه ن اولماز شيرين لبين شهدينى
بسدير٬ چوخ اينجيتدين فقير مئهدىنى
اگر كافير٬ ايندى موسلمان اولدو.

------------------------------------------------------------

آقاي صادقيان

همدان شهريندن- آزربايجان

آنا يوردوم، همدان !

بو گؤزه ل اؤلكه ميزين ، گؤرمگه وار آيري صفاسي
"همدان" توركلريني ايسته‏ مه ‏لي دوغدو آناسي

دين-و مذهبده آدي "مأمن مؤمن"دي بو شهرين
عئلمده باخ كي چاتيب هر يئره دؤنيادا صداسي

يايدا گزگين‏لر ايله شهر، ائله بيل، پاريس'ه بنزه ر
بلليدير چونكو اونون سئومه ‏ليدير آب-و هواسي

« عليصدر» غاريني گؤرسه اولاجاق خيلقته حئيران
بارك الله او يدالله كي قويوب اؤيله بناسي

فارسلارا وار بو نصيحت كي ياماندير بو منييت
فارس-و تورك ، كورد-و لُورين هاميسينين بيردي خداسي

بويوروبدور بونو قورآن كي فقط تقوالي اوستدور
كيسمه كي اه يمه‏‏ يه باش بونا اونون يوخدو خوداسي

هاني "آخوند شوندي" ، هاردادير "شئيخ بهاري" ؟
هاني "موللا علي معصوم" ائله ميش ترك-ي معاصي

آنا يوردوم، همدان ! "تنها" سنه سؤيله ‏دي ، سن ده
سؤيله شاعيرلر ايچينده ، شيعرينين چوخدو باهاسي

------------------------------------------------------------

محمدرضا تكرلي

شهر همدان- استان همدان آزربايجان

محمدرضا تكرلي ( متخلص به رائف) به سال 1353 در شهر همدان متولد شد . وي از كودكي عشق و علاقه وافري به ادبيات شفاهي و فولكلور داشت. همواره به زبان مادري اش "تركي"، عشق مي ورزيد، از اين رو اشعار، ترانه هاي محلي، داستانها و ضرب المثلهاي تركي ايل و تبارش را جمع آوري مي كرد. اما آنچه كه وي را بر آن داشت کكه شعر تركي بگويد، تشويق دبير تاريخش بود (كه خود وي هم شاعر بود). رائف غزلي هشت بيتي ساخته بود با مطلع :

ز غمت فزون شده اندرون چـو دل خزان به خـدا قسم

ز غـمت به جان خطري روان شده در جهان به خدا قسم

که بيتي از آن ملمع تركي داشت:

سنه بو اورک گوزه ليم گرك گئچه دونيادان اوله گوزلره

که براي تو چو بميرد او شده در تو جان به خدا قسم

معلم از او خواست دو باره و چند باره اين مصراع را بخواند و در آخر گفت: "با وجودي كه من تركي نمي دانم، اما از اين مصرع لذت بردم. اميدوارم به تركي هم شعر بگوييد."

آنچه در ذيل مي خوانيد نمونه اي از سروده هاي اوست :

توركجه ني سئوه ريك سني ده آنا

اوينـوردو ياپراق يئل اته يينـده
ياتميشيديم دامدا من ده سرينده
ساراليردي گونش آي دره سينده
قارانلـيق گليـردي بيـزيم آرايا
گيريردي قوشلار سسله يووايا

قارا گئجه گليب كؤكسوم توتوبدور
بوغونتويا ساليب گونو اوتوبدور
تولكي دوشمن قارانليقدا بوسوبدور
ديليمي ائليمدن آيري ائديرلر
ائليمه اؤزگه ديلين اؤرگه ديرلر

يوواما-يوردوما دوشوب بير گئجه
آديني بيلميره م سؤيله ييم نئجه
اوشاقا اؤرگه تمـير آنا توركوجـه
يوخسا ديليميزي عـار بيلييـورلار؟!
شانلي ائليميز ي خار ايستييورلار؟!

او قوهوم ، او ميللت ديليـن بيلمه سين
غميني ـ درديني جاندان سيلمه سين
چاره سي بودور کي ائلدن کسمه سين
اؤزونو گونشدن آيري سالماسين
ائليني ـ ديليني پولا سـاتمـاسين

"راييف" سؤيله ر : بيلين! قارانليق قاچار
او گؤزه ل گونشيم دوغـودان دوغار
بالالار اوخـويار، چؤگـورلر چـالار:
توركجه ني سئوه ريك سني ده آنا
جاني ـ باشيم قوربان آذربايجان´ا

------------------------------------------------------------
عليرضا كامراني دانا

لَلين (لالجين) شهه ريند‏ن- همدان اوستاني- آزربايجان

(« سينا » هفته لييينين 115- نجي ساييسيندا چاپ اولموش )

نه ‏دي دونيا

انـدوه-و غميـن گـوزگوسو ، غمـخانه‏ دي دونيـا
افسانه يازانلار يازيب : افسانه‏ دي دونيا

آلدانما زر-و زيـورينه ، يـوخدو وفـاسي
هم دام-ي فريبنده‏ دير ، هم دانه‏ دي دونيا

بير لحظه‏ ده ، ويرانه جيداري ييخيلان‏دير
ويرانه ‏يه يورد سالما كي ويرانه‏ دي دونيا

هر ائو كي سو اوسته سالينيب ، غرق اولوب آخير
سو اوسته سالينميش ائو- و كاشانه ‏دي دونيا

ائي كاخدا-و قصرده منزيل ائده ن اينسان
گئت "دارِ-ي سلام" ايچره ، گؤر آيا نه‏ دي دونيا

گؤر نه سوروشوب "نوح-ي نبي"دن "ملك العرش"
باخ "نوح" بيانيندا ، عزيزا ، نه ‏دي دونيا

"جبريل-ي امين" ، نازيل اولوب نوح`ه سوروشدو:
چوخ عؤمر ائله‏ يه ن حضرت-ي نوح`ا ، نه ‏دي دونيا ؟

حضرت بويوروب پئيك-ي خوداوند-ي جليله
ايككي قاپيلي ائو كيمي بير خانه ‏دي دونيا

بو مطلب-ي زيباني بيله ندن سورا ، واللاه
هر كيم سنه بئل باغلاسا ، ديوانه‏ دي دونيا

فخريم بودو : مدداح-ي حوسئين ايبن-ي علي`يه م
جان-و قلميم وقف او سولطانه‏ دي ، دونيا

شيش گوشه مزاريندان اوزاق دوشماغا خاطير
"دانا" اوره يي " اُستُنِ حنّانه "دي ، دونيا

------------------------------------------------------------
عباس مرادي (ياز)

باهار شهه ريند‏ن- همدان اوستاني- آزربايجان

(« سينا » هفته لييينين 115- نجي ساييسيندا چاپ اولموش )

آلين يازي

گَلَه ن گوندن يالان اولدون ، ازل گوندن يالان دونيا!
وفاسيز ! اولموشام سن بيوفادان باغري قان ، دونيا!

جفالار چكميشه م سندن ، بلايا دوشموشه م سندن
گيريفتار اولموشام سندن ، منه زيندان اولان دونيا!

اَليندن ناله‏ لر گؤردوم ، سارالان لاله لر گؤردوم
كؤچَه ن كؤچدو ، گله ن گئچدي ، بلالي ساربان دونيا!

قوجالديم ، هوش ـ هوس اوچدو باشيمدان ، اولموشام يورغون
گؤزوم گؤرمور ، آياق گئتمير ، داخي اولمام جوان ، دونيا!

گئجه ـ گوندوز فغان ائيله‏ ر ، يازار " ياز " غملي دفترلر
آلين يازي يازان يازميش منه آه-و فغان ، دونيا!

------------------------------------------------------------
مهدي طراوتي توانا

باهار شهه ريند‏ن- همدان اوستاني- آزربايجان

( « سينا » هفته لييينين 115- نجي ساييسيندا چاپ اولموش )

مهدي طراوتي توانا، متولد سال 1358 از شاعران جوان شهر بهار (واقع در استان آزربايجاني همدان) است. وي از دوران نوجواني به طبع آزمايي در عرصه شهر تركي و فارسي پرداخته و بهره گيري از محضر استاد غلامرضا بهاري (باهارلي)، گامهاي او را در اين مسير محكم تر نموده است و البته آشنايي طراوتي با آثار ادبيِ قله هاي شعر تُرك همچون علامه فضولي، حبيب ساهر، شهريار، سهند، ناظم حكمت و ... نقشي تعيين كننده در مسير تفكر شعري و ادبي او داشته است.اينك نمونه اي از شعر او :

تورك`ون ديلي

ايللر گئچيب ، اويان يوخودان شانلي قارداشيم !
سسلَه ن : باهارلي ! آيدينا چيخسين قارانليغين

سـَسـله ن اويـانسيلار يوخودان تورك ائللري
بيلسين حرامي‏لر آپارير يولدا وارليغين

اوتراق ائتمه اؤزگه ديلين كؤلگه ‏سينده ، دور !
تورك`ون ديلي ايله ائيله بنا جاودانليغين

تورك`ون ديلي سنينله اولوب دوغما قارداشين
سن ده بو دوغما قارداش ايله آت اوتانديغين

------------------------------------------------------------
غلامرضا عابدينلو

رزن شهه ريند‏ن- همدان اوستاني- آزربايجان

آنــا

(« سينا » هفته لييينين 115- نجي ساييسيندا چاپ اولموش )

گل بيـر آنـا اَه يـله ش دؤنــوم باشيــوا
قـادان آليــم قوربان كسيم قاشيوا

غمـلي گؤرسه م سني ، گؤزوم ياش اولار
منــيم نظــريمده دونيا باش اولار

مئهـرين قلبيـمده‏ ديـر آنـا ! بيـليــرسـه ن
آنـد او قيبـله‏ يه كي ناماز قيلارسان

بـارماقـلارين چـاتيــن آنـا گــؤره نــده
ايش توخويوب يا كي كؤينه ‏ك هؤره نده

بئلــه بيـل كـي اوره ييــمي داغــليـران
اونـدا كـي سن بارماقلارين باغليران

ناخـوش ايديم ، صوبـحا كيـمي ياتمادين
آي تك ، باشيم اوستونده سن باتمادين

صوبحـا قـده ر مندن گيـزلين آغـلارديـن
گـاه دؤشـونه ، گـاه داليـنا بـاغـلاردين

اينـدي داخـي گئـچيب گئديب او گونلر
اينـشاۆ آللاه آچيــليبــديـر دويــونـلـر

قيش گليـري ، گتـير كـؤرسون قـورگيلَه ن
تنـدير دؤشـونه يئـرآلمـا وورگيــــله ن

كاش ييغـيلاق گئـنه سـؤرفـه بـاشيـنا
هئـي گـؤز تيـكَه ك قـابلامـانين آشيـنا . . . .

------------------------------------------------------------

مظفر غفاري نوين

جهننــمه ! !

ايسكيناس بيزلريله ن هئيچ ايشي يوخ ، جهــننمه !
يا كـــي بيزلر آجيـگ -و فيلاني توخ ‌، جهننــمه !

كاباب اولدو اوره ييم ، اوشاق كاباب گؤنو چكير
بو باهاليــق وورورو قلبيــمه اوخ٬ جهنــنـمه !

بس كي شادليق ائله ييب فيلاني گونونو ووروب
بيچــاره ـ بينوانين غوصصه سي چـوخ٬ جهنـنمه !

بينوا مشــدي فيلاني ، نه ايشـــي وار نه پـولو
عصـــباني اوتوروب حؤوصله پـوخ٬ جهننــمه !

باخ گيــله ن ايفاده يه حاجي فيلان خانـزاده سي
گونده بير مودئل گئيير خوشدور- و شوخ٬ جهننـمه !

آجليــغي بس كي چكيب جمالي بنزه ر گيچي يه
يوخدو بير كس سوروشا آجدي ‌يا توخ٬ جهننـمه !

جور به جور منزيلي وار ، نئچـه جوره ماشين-ي بئنز
حرام اولسون اونا وار چوخ ، بيزه يوخ٬ جهنـنــمه !

------------------------------------------------------------

علي اصغر مصطفوي

لالجين شهه ريندن-بهار شهريستاني- همدان اوستاني- آزربايجان

سن ده بئله مغرور-ي جمال اولما ، عزيزيم !

(« سينا » هفته لييينين 113- نجو ساييسيندا چاپ اولموش )

عؤمروم گئچيب احوال‏ـ ‏ي جوانليق هاني قارداش
ايششيق گونوزوم اولدو قارانليق داخي ، قارداش
بوش معريكه‏ ده اوْل قورو خانليق هاني قارداش؟
افسوس! گئچيب عؤمر ، توگه ندي اوْ طراوت
اُوْل بزم‏ـ‏ي طرب اولدي حيكايت هامي ، قارداش

پيس وقتده بويوردون سنه بير شئعر يازام من
فيكر ائيله ‏مه‏ دين بلكه بو اشعاري آزام من
يا يازديغيم اشعاري جيسارتله پوزام من
يوخدور داهي بنده ‏نده اوْ ذؤوق ايله شهامت
گول اولدو خيزان ، باغ‏ـ‏ي فصاحت هاني ، قارداش

نه باشدا واريم حؤوصله ، نه قلبده طاقت
بير لحظه ‏ده جيسميم تاپيري ضعف-و كسالت
اؤتدو گؤزه ‏ل عؤمروم ، هامي جهل ايچره ، جهالت
هر چند جوانلاردا دا قالماز بو وجاهت
گئد گؤلشَنه باخ ! گؤر او طراوت هاني ، قارداش؟

ايندي دلي‏لر تك اولورام من عصباني
هر لحظه دوشور ياديما اييام-ي جواني
چوخدور اوره گيمده ، منيم ، اسرار‏ـ ‏ي نهاني
فاش ائيله‏ مه‏ ره م ، ائيله‏ مه ‏م هرگيز ده شيكايت
عاجيزدي قلم ، وقت‏ـ ‏ي كيتابت هاني ، قارداش

سن ده بئله مغرور-ي جمال اولما ، عزيزيم
لاكين چو من آزورده خيال اولما عزيزيم
سن عاشيق-ي آمال-ي محال اولما ، عزيزيم
دوشمه ز الينه ، يوخدو داهي هيجرينه طاقت
عاشيقلار اوچون صبر-و متانت هاني ، قارداش؟

بو دهرده ، گَل سالما اؤزون درد-و بلايا
فيـكر ائيلَه‏ گيـلَه ‏ن گئتـمه ‏گينه دارـ ‏ي بقـايا
"نمرود"ي ، "سؤلئيمان"ي فلك ووردو فنايا
بيل گورگِ-ي اجل جنگينه يوخ كيمسه‏ ده طاقت
گر چاتسا اجل ، وقت-ي خلاصت هاني ، قارداش؟

بئش گون ، باشارارسان ، هامي مخلوقا وفا قيل
آت جور-و سيتم داشيني ، سن ترك ‏ـ ‏ي جفا قيل
گل ديققت ايله ، بيرجه نظر بر سولفا قيل
گؤر هاردا ، او كس‏لر كي به صد شور-و وقاحت
سندَن قاباق ائيله ردي ريياست ، هاني ، قارداش؟

سؤز دوشدو اوزون ، ختم ائليره م ، ائتمه گيلايه
لازيـمدي بـو اشعـاري چـكه م كربُوبَـلايا
چون نوحه ‏گره م ، سن كيمي ، شاه‏ـ ‏ي شوهدايا
گر ائتمه ‏سه محشرده من-ي زارا شفاعت
بو عبدِ-ي گُونَه‏ كارا سعادت هاني ، قارداش؟

------------------------------------------------------------

خسرو قرباني (غريب)

باهار شهه ريندن- همدان اوستاني- آزربايجان

قالميشام حئيران بو چؤلده!

(« سينا » هفته لييينين 113- نجو ساييسيندا چاپ اولموش )

ضرر وئردي منيم بوسسان بو چؤلده
ننه جان! قالميشام حئيران بو چؤلده

موكافات چكديم-و قالديم بلادا
كي پولسوزلوق اولا درمان بو چؤلده

منيم قارپوزلاريم ائرري اولاندا
دييه‏ رديم هر گئجه: "جان! جان!" ، بو چؤلده

ائشيتديم قارپوزون نيرخي سينيبدير
اولوبدور گؤزلريم آل قان ، بو چؤلده

گله ن مووقئع ، ننه! ، فيل هئيكَلييديم
بوگون ، باخ ، اولموشام قئيلان بو چؤلده

بو چارداقدان او چارداغا قاچارديم
ننه جان! اولموشام دووشان بو چؤلده

ننه! چوخ جيرميشام من ايشله ‏يَه نده
بوليز-و كؤينه ‏گ-و توممان ، بو چؤلده!

ننه! گل داديما ، چاره سيز اولدوم
كي سانجدي قيچچيمي ايلان بو چؤلده!

اگر دا من بو چؤلده بوسسان اكديم ...!
كي اولدو بي وفا بوسسان بو چؤلده

گئجه ‏لر ياسسوغوم چؤلده ايته‏ ردي
قويارديم يئرينه "قازان"! بو چؤلده

ليباسلار هامي اولدو پاره ـ پاره
كي دلدي هامميني سيچان بو چؤلده

ننه جان! "يئر صاحاب" بيردن گه‏لَه ندَه
ووراردي كلله ‏مه فينجان بو چؤلده

ياتان چاغي ، گئجه چارداق ايچينده
ائله ‏ردي "مِيغمِيغه" طوفان بو چؤلده

توفنگ-و توپ-و تانگ ـ مانگ يوخ بو ياندا
توته ‏رديم اَله "جير سوببان" بو چؤلده

نه دوگو وار ايدي ، نه آش ، نه تُووق
ايچه‏ رديم هر گئجه ائيران ، بو چؤلده

"دليران لييان شامپو" بيلير كي
اولاردي "اَپپايي" "لينچان" ، بو چؤلده

مني از بس ووروبدور يئر صاحابيم
اولوبدور پئيكريم لرزان بو چؤلده

بو بوسساندا ، گنه ائششگ دَمي گرم!
كي اولدو وفالي حئيوان بو چؤلده

اگر من ائششه ‏گه چايير اَكه ‏يديم
گئده ردي سورعت-ي پئيكان بو چؤلده

"غريب" ! سن بير بئله يالان دئمه‏ زدين
نه اولدو اولموشان چاخان بو چؤلده

------------------------------------------------------------
علي صادقي (وورغون)

باهار شهه ري- همدان اوستاني -آزربايجان

( « سينا » هفته لييينين 117- نجي سايسيندا چاپ اولموش )

علي صادقي ( وُورغون ) به سال 1338 در شهر "بهار" ديده به جهان گشود. گرچه تنگناي مالي و معيشتي خانواده امكان ادامه تحصيل را از وي سلب نمود و او فقط تا كلاس پنجم ابتدايي توانست به مدرسه برود اما اين امر مانع از آن نشد كه استعداد ادبي وي كه با عشق به زبان مادري اش تركي ، آميخته بود، با تكيه بر ميراث گرانسنگ شعر و ادب دنياي ترك و بهره گيري از محضر اساتيد شعر و ادب تركي در بهار از جمله استاد غلامرضا بهاري(باهارلي) و استاد بشير فضائلي، شكوفا و بالنده گردد. آنچه در پي مي آيد چهار نمونه از اشعار "وورغون" با عنوانهاي« ايشاللا »،« درد اليندن » ، « اؤلسه م ده » ، « آنا يوردوندا قال وورغون » است كه تقديم خوانندگان عزيز مي گردد :

توش گَلسه م آشيق ريضا`يَه

ائي آقـالار دلـي گؤيـلوم كاميـني
بير گون بوُ دونيادان آللام ايشاللا
فلكـين اليـندن ، اَجَـل جاميـني
آليب ، ايچيب سَرخوش اوْللام ايشاللا

حضرت ـ ي عزراييـل آلاندا جانـي
وقت يئتيشه ر تَرك ائدَه رَه م دونياني
توْپراغه سالارام جيسم ـ ي عورياني
اوْ دونيا قاپيسين چاللام ايشاللا

ملاييكلَـر قـاپي آچـار اوزومَه
جننت باغي ، خوْش گؤرونَه ر گؤزومَه
آنام گَلَه ـر اَليـن قـوْيار ديزيمَه
قوْللاريم بوْينونا ساللام ايشاللا

بو باشيما گله ن درد ـ ي بلايه
ال گؤتورره م شوكر ائيله ره م خودايه
محشرده توش گَلسَه م آشيق ريضا`يه (1)
اليندن ساز آليب چاللام ايشاللا

كؤوثَر قيراغيـندا گؤررَه م آقامي (2)
" وُورغون"ام ، موولايا وئررَه م سلامي
موبارك اليـندن آلارام جامي
مست اوْلوب يانيندا قاللام ايشاللا

1) آشيق رضا : " آشيق رضا باهارلي " از بزرگترين آشيق ها و شاعران مردمي دنياي ترك كه به تقريب 300 - 350 سال پيش از اين، در شهر " بهار " ( باهار ) مركز شهرستان هنر پرور " بهار " ( باهار ) چشم به جهان گشود و « بئيش بند »ها و اشعار تركي اش ورد زبانها است. 2) آقا : حضرت علي ( ع )

درد اَليندن

ائي آقـالار درد اَليـندن
غمـلي گؤيلوم دؤنوب قانا
بوُ جسم-و جان-ي بيماريم
دوشـوبدور بوْردا زيـندانا

گون ـ به- گون آرتيري غميم
فلك سيـنديريبدير دَمـيم
دوشـوبدور گيـردابا گَميم (1)
يالواررام شـاه ـ ي مـردانا

مجنون كيمـين دوشـدوم چؤلَه
بولبـول تَكـين گَلديم ديلَه
اوچـدوم ، قوْندوم گولـدن ـ گولَه
تا يئـتيـشَه م گولوسـتانا

بوُ دونيـادا اوزوم گولـمَه ز
هئيچ كيمسه درديمي بيلمَه ز
موولايا قـوُل (2) اوْلان اؤلـمَه ز
جانيـم قوُربان اوْ سولـطانا

چوْخ موددتـدير اينـتيـظارام
قالان عؤموردن بيزارام
" وُورغون " دييَه ر وفادارام
مورتضـا شـير - ي يزدانا

آنايوردوندا قال " وورغون " !

زامان ايله ، ازل گوندن ،
آرام ساز اولمادي بيرگون
باهاريم دؤندي پائيزه
قيشيم ياز (1) اولمادي بيرگون

جوانلوق چاغي دونياده
گولوستانيم خزان اولدو
خياليم بولبول ايچين
وقت-ي پرواز اولمادي بير گون

يالان دونياده خوش گون
گؤرمه ديم بير لحظه عؤمرومده
غميم درديم چوخالدي
هر زامان ، آز اولمادي بيرگون

گئچه ن گون حسرتينده
عؤمرومو ووردوم باشا هردم
يازيقلار كي (2) اوگونلر
بير ده آغاز اولمادي بيرگون

آنا يوردوندا قال "وورغون"
آماندير ائلدن ال چكمه
اولار كيم ائلدن ال چكدي
سرافراز اولمادي بيرگون

1) ياز : باهار فصلي ( " بهار" شهه رينده " قره ياز" دَه دئييله ‏ر )

2) يازيقلار كي : حئييف كي

اؤلسه م ده

دؤوران اَلي ظولم ائيله دي سؤندوردو (1) چيراغيم
قان اوْلدو اوره ك ، گئچدي عؤمور سوْلدو ياناغيم (2)

ياغديردي كده ر ياغيشي ، اسديردي بلاني
ايسلاندي ائو ، ايبيندي(3) داميم ، چؤكدو اوْتاغيم

يوْخسوللوق-و بختسيزليگ ايله دردلره دؤزدوم
قحبه فلك هر ايككيسيني ائتدي قوْناغيم

آللاه نَه دئييم چوْخ يامان ايش باشيما گلدي
هيجران اوْتونو داددي گؤنول ياندي دوداغيم

"وُورغون" دئيَه ر : اؤلسه م ده يابانجي (4) ائله گئدمَه م
ياد (5) ائل يوْلونا بير ده داها وارماز (6) آياغيم

1) سؤندورمك/ سؤندورماق : گئچيرتمك 2) ياناق : فارسي ده ياني " گونه " 3) ايبينمك / ايبينماق : خيس اولماق 4) يابانجي : اؤزگه ، ياد (" بهار " شهه رينده دئيه رلر : " يازي - يابان " كي فارس ديلينده ياني بيرون ، خارج ) 5) ياد : اؤزگه ، يابانجي ( " بهار " شهه رينده دئيه رلر : " ياديخديرماق " كي ياني : اؤزگه له شديرمك ، بيگانه له شديرماق ) 6) وارماق : گئدمك / گئدماق